Musikkskúlaskipanin varð sett á stovn sum ein royndarætlan í 1981. Í 1984 varð lógin samtykt og sett í gildi. Sama ár varð Tórshavnar Musikkskúli stovnaður sum stovnur undir Tórshavnar kommunu.

Fyri at undirvísa í musikkskúlaskipanini krevst prógv frá musikkonservatorii ella onnur hægri útbúgving í tónleiki.

Land og kommuna gjalda hvør sína helvt av læraralønunum. Harumframt veitir Tórshavnar kommuna eitt eyka ískoyti til virksemið í skúlanum.

Tórshavnar Musikkskúli heldur til á Landavegi 84.

Í skúlanum starvast fleiri enn 50 lærarar, og hvørja viku fáa umleið 800 næmingar frálæru í ljóðførisspæli. Frálæran fevnir eisini um samanspæl í størri og smærri bólkum og bókligar lærugreinar, eitt nú tónleikaástøði, hoyrilæru og tónleikasøgu.

Skúlin samstarvar við aðrar skúlar og mentanarstovnar, eitt nú við Skúlan á Fløtum um Litir í Leiki og Skúlan við Løgmannabreyt um Ljóð í Leiki.

Tórshavnar Musikkskúli samstarvar eisini við Glasir og Fróðskaparsetur Føroya um frálæru í tónleiki.

Musikkskúlamiðnám og orgulleikaraútbúgvingin eru partur av virkseminum í Tórshavnar Musikkskúla.