Hjartaliga vælkomin á Musikkskúlamiðnám.

Á Musikkskúlamiðnámi fært tú møguleika at menna teg bæði sum tónleikari og sum menniskja gjøgnum einstaklingaundirvísing, samanspæl, ástøðilig fak, verkætlanir og framførslur.

Vit leggja stóran dent á fakliga góðsku, gott samstarv og eitt trygt lestrarumhvørvi, har øll kunnu mennast og trívast.

Í hesi handbókini finnur tú tær týdningarmestu upplýsingarnar um Musikkskúlamiðnám. Hon inniheldur praktiska kunning, skilhaldsreglur og mannagongdir, sum hjálpa tær í gerandisdegnum sum MuMi-næmingur.

Hevur tú spurningar, ert tú altíð vælkomin at venda tær til lærara, samskipara ella skrivstovuna.

Vit gleða okkum til eitt gott og mennandi skúlaár saman við tær.

Musikkskúlamiðnám (MuMi) er ein trý ára tónleikaútbúgving hjá Tórshavnar Musikkskúla fyri ung, sum hava serligan áhuga fyri tónleiki og ynskja at menna seg á høgum fakligum stigi.

Útbúgvingin gevur næmingunum møguleika at menna sínar førleikar bæði sum tónleikarar og í felag við øðrum gjøgnum einstaklingaundirvísing, samanspæl, ástøðilig fak og konsertir.

MuMi er skipað soleiðis, at hon kann takast samstundis við aðrari miðnámsútbúgving. Undirvísingin er løgd til rættis við hesum fyri eyga.

Útbúgvingin endar við ársroyndum og eini samlaðari meting av fakligu menningini hjá næminginum.

Málsetningurin við Musikkskúlamiðnámi er at geva næmingunum eitt sterkt fakligt grundarlag – bæði teimum, sum ætla sær víðari tónleikaútbúgving, og teimum, sum ynskja at menna sínar tónlistarligu førleikar á høgum stigi.

Lógargrundarlag

Musikkskúlamiðnám er skipað sambært kunngerð um undirvísing í musikkskúlamiðnámi og kunngerð um próvtøkur, próvtalsstiga og kærur í sambandi við útbúgvingina.

Undirvísingin er í miðal níggju tímar um vikuna. Næmingar hava møtiskyldu til undirvísingina.

Valfak

Næmingar kunnu fáa møguleika at velja valfak sum part av undirvísingini. Hvørji valfak verða boðin, kann broytast frá ári til ár. Næmingarnir fáa nærri kunning um valfakini við skúlaársbyrjan.

Soleiðis verður tað greitt, hvat byggir á kunngerðina, og hvat er undirvísingartilboðið hjá skúlanum. Orðingin bindur heldur ikki skúlan til at bjóða ávís valfak á hvørjum ári.

3. Samskifti

Gott samskifti er ein fortreyt fyri einum góðum skúlaári. Tí er umráðandi, at næmingar javnan kunna seg um boð frá Musikkskúlamiðnámi.

Teldupostur

Teldupostur er høvuðssamskiftisleiðin hjá Musikkskúlamiðnámi.

Í telduposti verða millum annað send:

●   kunning um undirvísing

●   broytingar í tímatalvu

●   kunning um konsertir og verkætlanir

●   onnur týdningarmikil boð

●   Kanna tí teldupostin javnan.

Avlýsing og broyting av undirvísing

Verður undirvísing avlýst ella flutt, fáa næmingar boð skjótast gjørligt gjøgnum vanligu samskiftisleiðirnar hjá Musikkskúlamiðnámi.

Telefon og sms

Tá tørvur er á skjótum samskifti, kann Musikkskúlamiðnám samskifta við næmingar umvegis telefon ella sms.

Tí skulu næmingar tryggja, at telefonnummar og teldupostur altíð eru dagførd í SpeedAdmin.

SpeedAdmin

SpeedAdmin verður brúkt til at umsita undirvísingina á Musikkskúlamiðnámi. Har kunnu næmingar millum annað finna:

●   tímatalvu og yvirlit yvir undirvísingina

●   broytingar í tímatalvuni

●   yvirlit yvir lærarar

●   telefonnummur og aðrar samskiftisupplýsingar

Næmingar skulu kanna SpeedAdmin javnan og tryggja, at teirra egna telefonnummar og teldupostur altíð eru dagførd í skipanini.

SpeedAdmin verður eisini brúkt til bóking av venjingarrúmum. Nærri kunning um hetta er í kapitli 6.

Hevur ein næmingur trupulleikar við at rita inn ella finnur villur í upplýsingunum, skal næmingurin venda sær til skrivstovuna.

Samband við læraran

Spurningar um undirvísing, venjing, heimaarbeiði og fakligt innihald skulu sum útgangsstøði takast upp við viðkomandi lærara.

Samband við samskiparan

Spurningar um tímatalvu, fráveru, konsertir, verkætlanir og onnur viðurskifti, sum viðkoma Musikkskúlamiðnámi, kunnu takast upp við samskiparan.

Samband við skrivstovuna

Skrivstovan hjálpir millum annað við:

●   gjøld

●   váttanir

●   onnur fyrisitingarlig viðurskifti

Reglulig luttøka í undirvísing, samanspæli, konsertum og øðrum virksemi er ein fortreyt fyri at fáa fult gagn av Musikkskúlamiðnámi.

Fráboðan um fráveru

Kann ein næmingur ikki møta til undirvísing, samanspæl, konsert ella annað virksemi, skal næmingurin boða frá skjótast gjørligt.

Frávera skal fráboðast øllum teimum lærarum, sum verða ávirkaðir av fráveruni, umframt samskiparanum fyri Musikkskúlamiðnám.

Skráseting av fráveru

Øll frávera verður skrásett.

Fylgt verður við fráveruni gjøgnum skúlaárið, og samskiparin tekur samband við næmingin,

um tørvur er á tí.

Mesta loyvda frávera

Frávera má ikki fara upp um:

●   15 % í einstøkum faki

●   10 % samanlagt

Er fráveran størri enn loyvt, kann tað fáa avleiðingar fyri møguleikan at halda fram á Musikkskúlamiðnámi.

Frávera frá ársroynd

Frávera frá ársroynd ella próvtøku verður viðgjørd eftir mannagongdini í kapitli 8.

Á Musikkskúlamiðnámi leggja vit dent á eitt trygt, virðiligt og mennandi lestrarumhvørvi, har næmingar og starvsfólk vísa hvørjum øðrum virðing.

Næmingar skulu møta stundisliga og vera væl fyrireikaðir til undirvísing og annað virksemi.

Harumframt skulu næmingar:

●   luttaka virkið í undirvísing, samanspæli, konsertum og verkætlanum

●   vísa virðing fyri næmingum, lærarum og øðrum starvsfólkum

●   fara væl um høli, ljóðføri og aðra útgerð hjá skúlanum

●   lata høli og felagsøki aftur í ruddiligum standi eftir nýtslu

●   fylgja teimum skilhaldsreglum og mannagongdum, sum galda fyri Musikkskúlamiðnám

Happing, niðrandi atburður, hóttanir, harðskapur og órógvandi atburður verða ikki góðtiknir.

Matur og drekka eru ikki loyvd í undirvísingarhølum, samanspælsrúmum og Hátúni.

Royking er ikki loyvd á økinum hjá Tórshavnar Musikkskúla.

Brot á skilhaldsreglurnar verða sum útgangsstøði tikin upp við samrøðu og vegleiðing. Er brotið álvarsligt ella verður tað endurtikið, kann tað fáa avleiðingar fyri næmingin.

Ein týdningarmikil partur av Musikkskúlamiðnámi er, at næmingar hava møguleika at venja uttan fyri vanligu undirvísingina. Til tess hava næmingar atgongd til venjingarrúmini í Tórshavnar Musikkskúla.

Lykil og atgongd

Allir næmingar á Musikkskúlamiðnámi fáa lykil til Tórshavnar Musikkskúla.

Lykilin er persónligur og má ikki latast øðrum.

Lykilin gevur bara atgongd til skúlan í sambandi við virksemi á Musikkskúlamiðnámi.

Missir næmingur lykilin, skal hetta fráboðast samskiparanum ella skrivstovuni beinanvegin.

Tá næmingurin gevst á Musikkskúlamiðnámi, skal lykilin latast aftur.

Nýtsla av skúlanum

MuMi-næmingar kunnu nýta skúlan til venjing uttan fyri vanligu undirvísingina.

Skúlin er opin til kl. 23.00. Tá skulu allir næmingar vera farnir úr bygninginum.

Trygd eftir arbeiðstíð

Næmingar, sum nýta skúlan uttan fyri vanliga arbeiðstíð, skulu kunna seg um rýmingarleiðirnar og savningarstaðið hjá skúlanum.

Við eldsbruna skal brunaávaringin setast í gongd, um hon ikki longu er farin í gongd. Ring 1-1-2, far úr bygninginum eftir nærmastu tryggu rýmingarleið og far til savningarstaðið í niðasta horninum á parkeringsøkinum eystanfyri skúlan. Lyftan má ikki nýtast.

Verður onkur álvarsliga sjúkur ella kemur til skaða, skal ringjast 1-1-2, um neyðugt. Fyrstuhjálparkassi og hjartastartari eru við móttøkuna. Álvarsligar hendingar, óhapp og trygdarmanglar, sum verða lagdir til merkis, skulu fráboðast samskiparanum ella leiðsluni skjótast gjørligt.

Far ikki inn aftur í bygningin, fyrr enn boð verða givin um, at tað er trygt.

Bóking av venjingarrúmum

Venjingarrúm skulu bókast í SpeedAdmin.

Bóking fer fram umvegis felags MuMi-brúkaran í SpeedAdmin.

Næmingar skulu bara nýta tað venjingarrúmið, sum er bókað.

Verður bókaða venjingarrúmið ikki brúkt, hevur næmingurin ábyrgd av at strika bókingina, so onnur kunnu brúka rúmið.

Ábyrgd

Næmingar skulu fara væl um høli, ljóðføri og aðra útgerð hjá skúlanum.

Eftir venjing skulu hølini latast aftur ruddilig.

Næmingar hava ábyrgd av at læsa hurðar, tá teir fara úr rúmum, sum ikki skulu nýtast av øðrum.

Verður okkurt óvanligt lagt til merkis, ella verður skaði staðfestur, skal hetta fráboðast samskiparanum ella skrivstovuni skjótast gjørligt.

Konsertir, samanspæl og aðrar verkætlanir eru ein týðandi og natúrligur partur av undirvísingini á Musikkskúlamiðnámi.

Gjøgnum skúlaárið luttaka næmingarnir í ymiskum verkætlanum og konsertum, har teir fáa møguleika at menna sínar tónlistarligu førleikar og royna seg saman við øðrum.

Luttøka

Næmingar hava skyldu at luttaka í teimum konsertum, samanspælum og verkætlanum, sum eru partur av útbúgvingini, um annað ikki er avtalað við samskiparan.

Fyrireiking

Næmingar verða væntaðir at møta væl fyrireikaðir til venjingar, samanspæl, konsertir og onnur tiltøk.

Tað fevnir um at hava vant tilfarið og hava neyðugt ljóðføri, nótar og aðra útgerð við.

Frávera

Kann ein næmingur ikki luttaka í eini konsert, samanspæli ella verkætlan, skal boðast frá skjótast gjørligt sambært galdandi mannagongd fyri fráveru.

Royndir og metingar eru ein natúrligur partur av Musikkskúlamiðnámi og geva eina mynd av fakligu menningini hjá næmingunum.

Ársroyndir og prótøkur

Allir næmingar skulu luttaka í teimum ársroyndum og próvtøkum, sum eru partur av útbúgvingini.

Fyrireiking

Næmingar verða væntaðir at fyrireika seg væl til ársroyndirnar og møta stundisliga.

Frávera frá ársroynd

Kann ein næmingur ikki møta til próvtøku vegna skjalprógvaða sjúku ella aðra orsøk, sum næmingurin ikki hevur ræði á, skal boðast frá beinanvegin. Sjúka skal skjalprógvast í seinasta lagi próvtøkudagin.

Nýggj próvtøka verður hildin í sjúkrapróvtøkuskeiðinum í august–september ella skjótast gjørligt.

Kunning og hjálpartól

Næmingar fáa kunning um próvtøkudag og klokkutíð í seinasta lagi 14 dagar frammanundan. Teir fáa eisini kunning um, hvørji hjálpartól eru loyvd til próvtøkuna.

At fáa ella veita hjálp undir próvtøku, tá tað ikki er loyvt, ella at nýta hjálpartól, sum ikki eru loyvd til próvtøkuna, hevur við sær, at næmingurin verður burturvístur frá próvtøkuni.

Serligar próvtøkuumstøður

Næmingar við skerdum sálarligum ella likamligum førleika ella øðrum serligum avbjóðingum kunnu søkja um serligar próvtøkuumstøður, so teir fáa somu møguleikar sum aðrir næmingar.

Royndarfreistir og krav

Ein næmingur kann í mesta lagi fara tvær ferðir til somu próvtøku á sama stigi. Fyri at standa Musikkskúlamiðnám skal næmingurin standa bæði høvuðslærugreinina og kravdu síðulærugreinirnar.

Meting

Eftir ársroyndirnar fáa næmingarnir bæði munnliga og skrivliga meting.

Tað er ein treyt fyri at halda fram á Musikkskúlamiðnámi, at næmingurin lýkur tær fakligu treytirnar fyri útbúgvingina.

Kæra

Næmingurin kann kæra skrivliga og grundgivið um próvtøkuna til landsmusikkskúlaleiðaran. Kæran skal vera latin inn í seinasta lagi fýra vikur eftir, at próvtøkuúrslitið er fráboðað.

Køkur

MuMi-næmingar kunnu brúka køkin við Gjønna.

Tá køkurin hevur verið nýttur, skulu næmingar rudda væl upp eftir sær. Koppar, tallerkar og annar borðbúnaður skulu setast í vaskimaskinuna, og burturkast skal koyrast í ruskspannina.

Køkurin skal latast aftur í sama standi, sum hann var, áðrenn hann varð tikin í nýtslu.

Kopiering

Næmingar kunnu kopiera á lærarastovuni í arbeiðstíð.

Uttan fyri arbeiðstíð er lærarastovan stongd, og tí ber ikki til at kopiera har.

Tráðleyst net (WiFi)

Næmingar kunnu fáa atgongd til tráðleysa netið við at venda sær til skrivstovuna.

Hevur tú spurningar um Musikkskúlamiðnám, ert tú altíð vælkomin at seta teg í samband við okkum.

Dagførdar samskiftisupplýsingar hjá samskipara, lærarum, skrivstovuni og leiðsluni eru á www.tm.fo.

Samskiparin

Samskiparin hevur ábyrgd av dagliga virkseminum í Musikkskúlamiðnámi.

Set teg í samband við samskiparan, um tú hevur spurningar um:

●   undirvísing

●   tímatalvu

●   fráveru

●   konsertir og verkætlanir

●   onnur viðurskifti, sum viðkoma Musikkskúlamiðnámi

Lærarar

Spurningar um undirvísing, venjing, royndir og fakligt innihald skulu sum útgangsstøði takast upp við viðkomandi lærara.

Skrivstovan

Skrivstovan hjálpir millum annað við:

●   gjøld

●   váttanir

●   útflýggjan og móttøku av lyklum

●   praktisk viðurskifti

●   onnur fyrisitingarlig viðurskifti

Leiðslan

Hevur tú spurningar, sum ikki kunnu loysast saman við lærara, samskipara ella skrivstovuni, kanst tú venda tær til leiðsluna.