Starvsvenjing og nýggjur tónleikur í Tórshavnar Musikkskúla

Í farnu viku vóru 5 starvsnæmingar frá Det Jyske Musikkonservatorium í starvsvenjing í Tórshavnar Musikkskúla.

Eisini luttóku teir í verkstovuarbeiði saman við næmingum á framleiðsludeildini. Har vórðu fleiri nýggj løg gjørd og framleidd.

Starvsnæmingarnir undirvístu eisini í skúlanum og fingu góðan kunnleika til arbeiðið í einum føroyskum musikkskúla.

Kristoffer Mørkøre, lærari á framleiðsludeildini, samskipaði vitjanina og skipaði fyri innihaldinum.

Talan var um eitt sera væleydnað samstarv millum Det Jyske Musikkonservatorium og Tórshavnar Musikkskúla.

Myndirnar vísa arbeiðið í verkstovunum og góða samstarvið millum luttakararnar.