Skilhaldsskyldur

Skilhaldsreglur verða settar í gildi fyri at geva øllum lærarum, næmingum og øðrum, ið brúka skúlan, góðar umstøður at virka undir. Skilhaldsreglurnar lýsa mannagongdir skúlans og skyldur teirra, ið brúka skúlan. 

Sámiligur atburður

  • Øll á skúlanum eiga at sýna umhugsni og sømiligan atburð, soleiðis at skúlin kann virka øllum at gagni. Happing, niðrandi tala og sálarligur- og likamligur harðskapur verður undir ongum umstøðum toldur millum næmingar ella starvsfólk í TM.

Hølisviðurskifti

  • Fyrilit skal havast fyri øllum teimum, sum virka í skúlanum, fyri húsinum og tí, sum inni er.
  • Virksemið í musikkskúlanum kann í fyrsta lagi byrja kl. 07.00 og skal í seinasta lagi endað kl. 23.00 á kvøldi.
  • Vit hava øll skyldu at halda skúlan og økið kring skúlan nossligt.
  • Hølini skulu, eftir brúk, latast aftur í sama standi, sum tey vóru fingin.
  • Um trupulleikar eru við hølunum, skal hetta fráboðast leiðslu skúlans.
  • Við atliti til grannar, skulu vindeygu ikki vera opin, meðan vant/spælt verður.
  • Hølini í Tórshavnar Musikkskúla skulu ikki brúkast til vinnuligt virksemi uttan serstaka avtalu við leiðsluna í skúlanum. 
  • Starvsfólk í Tórshavnar Musikkskúla, næmingar á musikkskúla miðnámi og Urguleikaraútbúgvingini hava lykil til skúlan.
  • Onnur kunnu fáa lykil til skúlan við at venda sær til leiðslu TM, sum tekur støðu í hvørjum einkultum føri.
  • Lyklar til skúlan kunnu verða givnir fyri styttri ella longri tíðarskeið, alt eftir hvør tørvurin er
  • Tey, sum hava lykil til skúlan, kunnu brúka hølini frá kl. 07.00 til kl. 23.00, tá ið hølini eru tøk. Lærarar hava atgongd alt samdøgrið. Uttan fyri vanliga virksemistíð er atgongdin hjá lærarum ætlað til bráðfeingis arbeiðsørindi. Tað er ikki loyvt at venja um náttina.
  • Í heilt serligum føri kann leiðsla TM stongja skúlan aðra tíð enn omanfyri nevnt, og harvið avmarka brúkið og rættindi at koma inn í skúlanum. Hettar kann gerast í bæði styttri og longri tíðarskeið.
  • Tað er leiðsla TM, ið tekur støðu til, um skúlin verður stongdur, og tað er somuleiðis leiðsla TM, sum kunnar starvsfólk skúlans, um hettar stig verður tikið.
  • Lyklar til skúlan kunnu gerast óvirknir í tíðarskeiðinum, ið skúlin er stongdur. Leiðsla TM tekur støðu í hvørjum einstøkum føri, um lyklar skulu gerast óvirknir ella partvíst óvirknir
  • Um ásetingar í mun til fyriskipan við lyklum og teimum rættindum tað viðførir, ikki verða hildnar, kann leiðsla TM taka lykilin frá viðkomandi uttan aðra fráboðan.

Ljóðføri skúlans

  • Ljóðførini hjá Tórshavnar Musikkskúla, ið hoyra heima í ávísum høli og sum dagliga verða nýtt til frálæru, skulu ikki flytast millum hølini.
  • Ljóðførini skulu undir ongum umstøðum nýtast uttanfyri skúlan uttan í serligum førum og uttan serstakt loyvi, sum einans kann gevast av leiðslu skúlans. Hetta er galdandi fyri lærarar og næmingar.
  • Um trupulleikar eru við ljóðførunum, skal hetta fráboðast leiðslu skúlans.

Myndir og upptøkur

  • Ikki er loyvt at taka myndir ella upptøkur av næmingum uttan loyvi.

Matur og drekka

  • Matur og drekka skal ikki nýtast í frálæruhølum skúlans.  

Royking

  • Royking er ikki loyvd í ella á skúlans øki. 

Rúsevni og rúsdrekka

  • Øll høli í Tórshavnar Musikkskúla eru fevnd av reglugerð hjá Tórshavnar Kommunu, har børn og ung ferðast. Tað er tí strangliga bannað, at rúsdrekka ella annað rúsandi verður nýtt á skúlanum.

Lestrarskyldur

  • Vit vænta, at næmingar í Tórshavnar Musikkskúla venja heima og møta til frálæru. Fært tú ikki møtt, boða læraranum frá.
  • Næmingar á Musikkskúlamiðnámi og Orgulleikaraútbúgvingini hava møtiskyldu til alla frálæru. Lærarar skráseta møting og fráveru í SpeedAdmin.
  • Á Musikkskúlamiðnámi er hægst loyvda frávera 15 % í hvørjum faki og 10 % tilsamans. Fer fráveran upp um annað markið, fylgir samskiparin upp saman við leiðsluni. Á Orgulleikaraútbúgvingini er markið 15 %.
  • Fer fráveran upp um 15 % í einum faki á Musikkskúlamiðnámi ella upp um 15 % á Orgulleikaraútbúgvingini, fær næmingurin skrivliga ábreiðslu frá leiðsluni. Verður ábreiðslan ikki tikin til eftirtektar, fær næmingurin eina skrivliga ávaring. Næmingurin váttar ávaringina, ella verjin, um næmingurin er undir 18 ár. Fleiri ávaringar verða ikki givnar. Lýkur næmingurin framvegis ikki møtiskylduna, heldur frálæran uppat.

Næmingar, ið eru útvaldir at umboða Føroyar í altjóða kappingum ella tiltøkum innan ítrótt, list ella mentan, kunnu sambært ‘Rundskrivi um fráveru hjá næmingum, sum umboða Føroyar í altjóða kappingum’ frá 27. oktobur 2016 søkja um loyvi at fáa loyvda fráveru frá skúlanum upp til í mesta lagi 10 skúladagar/skúlaár. Umsóknir um loyvda fráveru í sambandi við at umboða Føroyar í altjóða kappingum/tiltøkum innan ítrótt, list og mentan, kunnu verða játtaðar, treytað av, at:

  • Næmingurin umboðar Føroyar í altjóða kapping ella tiltaki innan ítrótt, list ella mentan.
  • Næmingurin røkir skúlan til fulnar, tvs. 1) møtir væl upp og 2) letur væl inn – eisini tað, ið skal latast inn í fráverutíðarskeiðinum – og 3) annars heldur lestrar- og skilhaldsreglur skúlans.
  • Umsóknin verður send til musikkskulin@torshavn.fo. Í umsóknini skal verða greitt frá tiltakinum og leiklutinum, sum næmingurin hevur í kappingini ella tiltakinum og harvið greitt frá, hvussu næmingurin umboðar Føroyar í kappingini ella tiltakinum. Næmingurin sendir sjálvur umsóknina, har váttan fyri úttøku frá felagnum er viðfest. Skjalið, felagið skal útfylla, fæst her. 
  • Umsóknin verður latin inn í góðari tíð – tvs. í seinasta lagi tvær vikur fyri tíðarskeiðið, hann søkir um. Um talan er um fráveru í ársroyndar-/próvtøkutíðarskeiði, má umsóknin sendast í seinasta lagi 1. mai.

Mett verður í hvørjum einstøkum føri, hvørt næmingurin lýkur hesar treytir. Ger hann ikki tað, verður umsóknin ikki gingin á møti, og verður hann skrásettur sum fráverandi, um so er, hann kortini velur at fara avstað.

Onnur loyvd frávera kann gevast av leiðslu skúlans og verður í slíkan førum avtala gjørd við avvarandi næming.

Til ber hjá næmingum í Tórshavnar Musikkskúla at fara í farloyvi í upp til eitt ár í senn. Umsøknir um farloyvi skulu sendast til musikkskulin@torshavn.fo

Næmingurin skal tá, eins og aðrir næmingar, aftur melda til skúlan í seinasta lagi 15. mai.

Hetta er eisini galdandi fyri næmingar í Musikkskúla miðnámi og Orgulleikaraútbúgvingini.

Næmingar í Litir í Leiki og Ljóð í Leiki kunnu ikki søkja farloyvi.

Næmingar og foreldur

Skilhaldsreglur

Vit vilja hava góðar umstøður fyri tónleik, læring og samveru. Her finnur tú skilhaldsreglurnar fyri vanliga musikkskúlaundirvísing og kunning um venjing, uppmøting og farloyvi.

Vís virðing

Vís øðrum fyrilit og gev teimum frið til at læra, venja og spæla saman.

Far væl um skúlan

Far væl um høli og ljóðføri. Sig leiðsluni frá, um okkurt er í ólagi.

Møt og ven regluliga

Ven regluliga, møt til undirvísing og sig læraranum frá, um tú ikki fært møtt.

Reglurnar í stuttum

Trivnaður og virðing

Musikkskúlin skal vera eitt gott stað at læra, spæla tónleik og vera saman. Vit vísa hvørjum øðrum virðing og fyrilit og hava í huga, at vit hava ymiskar førleikar og fortreytir.

Vit góðtaka ikki happing, niðrandi talu ella harðskap, hvørki sálarligan ella likamligan.

Tosa við læraran ella leiðsluna, um tú upplivir happing, niðrandi atburð ella ótryggleika í skúlanum. Sig eisini frá, um tú sært, at onnur ikki hava tað gott.

Nýtsla av hølunum

Far væl um hølini

  • Halt skúlan og økið kring hann reint og ruddiligt. Lat hølini frá tær í sama standi, sum tú fekk tey.
  • Vís fyrilit fyri øðrum í skúlanum og fyri grannunum. Vindeygu skulu vera afturlatin, meðan spælt ella vant verður.
  • Boða leiðsluni frá, um okkurt er í ólagi við hølunum.
  • Vinnuligt virksemi í hølunum krevur serstaka avtalu við leiðsluna.

Matur, drekka og royking

Ikki er loyvt at eta ella drekka í undirvísingarhølunum. Royking er ikki loyvd í skúlanum ella á skúlaøkinum.

Rúsdrekka og onnur rúsevni eru bannað á skúlanum sambært reglunum hjá Tórshavnar kommunu fyri høli, har børn og ung ferðast.

Myndir og upptøkur

Ikki er loyvt at taka myndir ella gera upptøkur av næmingum uttan loyvi.

Ljóðføri skúlans

Nýtsla og flutningur

Ljóðføri, sum hoyra til eitt ávíst undirvísingarhøli og verða brúkt har dagliga, skulu verða verandi í hølinum.

Ljóðføri skúlans kunnu bert takast við út úr skúlanum í serligum førum og við serstøkum loyvi frá leiðsluni. Hetta er galdandi fyri bæði næmingar og lærarar.

Boða leiðsluni frá, um okkurt er í ólagi við einum ljóðføri.

Venjing, uppmøting og frávera

Væntað verður, at næmingar møta til undirvísing og gera sær ómak við venjingini heima. Fært tú ikki møtt, skalt tú siga læraranum frá.

Ger venjingina til ein natúrligan part av gerandisdegnum. Legg venjingina til rættis saman við læraranum, so hon hóskar til tín.

Fá góð ráð um venjing heima

Farloyvi og tilmelding

Tú kanst søkja um farloyvi frá undirvísingini í upp til eitt ár í senn. Send umsóknina til musikkskulin@torshavn.fo.

Eftir farloyvi skalt tú, eins og aðrir næmingar, melda teg til aftur í seinasta lagi 15. mai.