Skip to main content Skip to footer

UVT Filter

Orgul

Frálæra

Frálæran í orgli er einstaklingafrálæra, har næmingurin fær frálæru frá lærara í 30 minuttir um vikuna. Frálæran tekur støði í orglinum sum solo-ljóðføri og er eftir eini námsætlan, sum hevur innbygd menningarstig og verður løgd til rættis eftir støði og menning hjá næminginum. Eftir vegleiðing frá læraranum keypur næmingurin nótar til frálæruna. Næmingurin fær vegleiðing í at venja og arbeiða sjálvstøðugt heima.

Konsertir o.a. virksemi

Partur av frálæruni og menningini av næminginum er at næmingurin spælir til næmingakonsertir - í byrjanini smá tónleikastykkir og lættar sangir, seinni størri verk og fýraraddaðar koralir, har bassurin verður spældur við pedal (við fótunum). Seinni spælir næmingurin bæði solospæl og til sang til guðstænastur, samkomur ella til dømis morgunsang, har spælast skal til felagssang. Ein partur av orgulfrálæruni er eisini at læra orglið at kenna, at vita hvussu tað virkar og duga at kobla stemmur til og frá - alt eftir tónleikinum og samanhanginum, spælt verður í.

Støðumet

Einaferð um árið skulu allir næmingar á skúlanum til eina lítla roynd, har næmingurin spælir fyri læraranum og einum øðrum lærara og fær síðani eitt støðumet. Støðumetið er vanliga um várið. 

Heim og skúli

Støðugt samskifti millum heim og skúla leggur góðar lunnar undir góða menning hjá næminginum. Umframt gerandisliga samskiftið millum lærara og foreldur eru eisini viðtalur; ein felags viðtala fyri øll foreldur við ársbyrjan og ein einstaklinga foreldraviðtala í sambandi við støðumetið um várið. 

Aldur

Til ber at byrja at spæla orgul frá umleið 10 ára aldri. Ung og vaksin, sum til dømis hava spælt klaver, kunnu eisini læra at spæla orgul.

Lán av ljóðføri / útgerð

Næmingurin skal sjálvur útvega sær ljóðføri at spæla á. Hetta kann í byrjanini vera klaver ella keyboard. Seinni kann næmingurin venja á orglum í kirkjum, sum hann saman við læraranum skaffar sær atgongd til.

Prísir og reglur

Leinkja til kunning um kostnað og reglugerð (uppmøting, avboð, sjúka, farloyvi o.s.fr.)